تعليقات أحد الشباب على الخطاب التوجيهي للأسد

خطاب توجيهي : يعني ما رح تبطل هالأبوة اللي عاملها و عم تغتصب بحجتها مجتمعنا و حريتنا ... البلد بمواجهة و انت عم توجه ... منين عم تجيب كل هالوجوه؟؟

 

هناك فجوة : بينك و بين الشعب

يجب ان نوازن بين الحاجات و الامكانيات : حاجاتنا انك تتحاكم و امكانيتكم صفر ... لذلك ما تفكر انو رح ننطركم


محصلة قوى : آه مزبوط انت دكتور بكلوريتك علمي + 40 علامة قفز مظلي

مؤامرة : ليك وين بعدو

لجنة التحقيق : هي لما المحقق بيحقق مع حالو و بيطلع بريء مو هيك ؟

الكرامة : أول مرة بتطلع من تمو غصب عنو، لأنها مطلب الشعب الحقيقي

رفع الطوارئ: أخي هي ضمن الحزمة مدري السلة مدري الرزمة ... و لا يهمكم الأسبوع الجايي

برميل مثقوب : فعلا إصلاحاتك و برنامجك و شخصك برميل مثقوب كبير ، لذلك دائما فاضي

سنحارب الفساد:  كيف بدك انو صدق كلامك و بعدو رامي مخلوف مفكر البلد
مناقصة ؟؟؟ و ماهر الأسد عم يشبـّح علينا


إعادة هيكلة الشرطة : طبعا مع وزير الداخلية الجديد المتخصص بمجازر ضد المعتقلين بسجن تدمر .. رح تكون إعادة الهيكلية مبشرة بكل خير

يجب ان نكون شفافين : بخطاب القسم من 11 سنة حكيت عن الشفافية .. بعدين كل شي تغير هو اللافتات بشعبة الحزب .. زادو كلمة الشفافية .. بخط كتير غامق ما فيه أي شفافية

لا أعرف ما هي ، هيئة بنية ليس واضحا : دققلنا المفهوم .. بحياة اختك ... بعدين منضيع... مو انت دكتورالمفاهيم .. و صرلك 11 سنة عم تبيعنا مفاهيم ... نفسي كنت شوف شي مفهوم نزل فتح حوار مع الواقع

هناك مكتب متابعات في مجلس الشعب للمتابعة : فعلا و قد فتحنا مكتب متابعة مهمته هي المتابعة و متابعة متابعته نفسها .... و بعدين بيطلع معها انو في واحد ألـّف مسرحية عن واحد ألـّف مسرحية قامت الرقابة منعتها، بعدين قامت الرقابة عنجد منعتها

علينا تخفيف المركزية : يعني انا أكبر مركز شايفو هو حضرتك يا سيدهم الرئيس ،
و المطلوب تخفيفك انت ... ركز معي يا مركز : انت أكبر مركز خففلنا حالك شوي

الحوار و التواصل : ما علموك بعلم التواصل انو اذا الرسالة بغير لغة بيكون في صعوبة عالمتلقي انو يفهم و بينعدم التواصل ... رسالتك كلها طلاسم بعدين إحكي منيح ، و حاج تقرط بالسين و الشين و الصاد و الضاد و الراء و القاف و العين و الغين و الفاء ... الخ




فتح الأقنية بيننا و بين المواطنين : طيب اذا في فجوة فالأقنية بهالحالة بتمر من فوق و لا من تحت الفجوة ؟؟

يجب أن نتعاون مع المجتمع الأهلي: ليش تركتو لحدا حرية التشكيل أو الإنخراط في منظمات المجتمع الأهلي و المدني ، الشعب بتلاقيه أو بالطلائع أو بالشبيبة أو باتحاد الطلبة أو بالحزب أو بالعسكرية .. عندو وقت يدير بالو عالمجتمع الأهلي ؟ اهلي+ن